प्हैर राख्या है
अंधेरै रा जिरह बख्तर
अर उडीकां हां
बदन पर रोशनी रा सर।
कुतरकां रा
कोट कर चोफेर
काछुआं रै मायं बड़रया हां
दुस्मणां रै
फूल मारां हां
अर कैवां हां खूब लड़रया हां
इण नदी सूं पार जावण नै
त्यार कर राखी है
म्हे एक न्याव भाठा भर
पींजड़ै रै मांय
पंछी है
रोपतो आकास मैं पाख्यां
कम कबीरै सूं कणां हां म्हे
स्सै
जबानी याद है साख्यां
वासना रा महल चिणरयां हां
म्हे सरै
सब्दां रा कारीगर।
