सुपनां में ईं मौत ई दीसै, जिनगी रास कियां आवै
छाती में तौ राध भरी है, नीका सांस कियां आवै
आवौ खांसी दम ई उपड़ौ
भाठा फोड़ां पेट भरां
कोई धणी न धोरी म्हारौ
कींकर जीवां कियां मरां
बिजळी घणी दूर म्हांरै सूं, घरां उजास किया आवै
सुपनां में ईं मौत ई दीसै जिनगी रास कियां आवै।
फाट्योड़ा गाभां में धापू
जोबन ढकती मांय लुकी
रामूड़ौ भूखौ ई सोयौ
मा-बापां री कमर झुकी
टाबरपण में बूढ़ा होग्या अब हिंवळास कियां आवै
सुपना में ईं मौत ई दीसै जिनगी रास कियां आवै।
