मैं देखू हूं
ईं म्हा नगरी रा
राकसी दरुजा
माणखा नै निगवै’र
पाछा उगल दे
माणखो भीतां रै भी नी पचै,
मैं देखूं हूं
बेरुतरा बुढ़ापा रा
दोलडायोडा मंगर
छान री धूंणी होर्या है
पोडर सूं लीपेडी
उमर रै मूंडा री लूरी
तोर्यं फूला बावडा में
खेलरो होगी,
हांफेड़ी जिंदगी
बस रा क्यूं में उबी
एक दूजा रा गोज्या हेरै है,
मैं देखूं हूं
लूंठा लूंठा साइन बोर्ड
खूंवां पर उंचेड़ी
म्हा नगरी में
मिनखां रो पलाव
ईं पलाव में
मैं भी बैतो जावूं
दूजां सूं आगै निसरबां तांई
दूजां रा छुलेड़ा खूंवा पर चढ़’र
छाजा पकडबा तांईं
ओपरा उणियारा मेवा में
म्हारो ओपरो पणों
म्हारै सू झूझै
आतो सै जाणै
कतरो ओखो है
अपणै आप सूं जुद्ध करबो।
निरणावासी छीयां
धोबीरा सूकता गाभां पर
पेट पलाण्यां रिगसै
मैं देखूं हूं —
आखी नगरी नै
खामोसी री रिजाई रा
छिण छिणां खोला में बड़तां
काला गूमडा सो कीं
मांय मांय जल बलावै
बार निसरवां तांई।
भीतां रै अेवड़ छेवड़
पडदा ई पडदा
इण रै ओलै
कुण मिनख पणां रो टेटवो घोटै
कुण जाणै?
मैं देखूं हूं
आदार्सां री दोड़ ओठ्यां
मरवारै तोडै जीवाला लोग
भुजेड़ा लोटिया सूं हेरै है
घुवारयां रा ओवसीड़ा री बास
चोरावा मैं उबी
नेताजी मूरत पर
कागला बींट करदी
मैं देखूं हूं
आखो दिन
भीड रै बाथेडा घालती,
उणीदी’र उघाड़ी सड़का
सीली रातां रा
चिन्याक ओसाण में
उवासी लेवै।
