गांव री गुवाड़ में
बरसां सूं खड़ी
चोखी घणी लागै
खुल्योड़ी सी जंगी जाळ।
जाळ री ठंडी छांव
तावड़ै सूं देवै निजात
राहगीर बिसायां लेवै
आच्छी घणी लागै जाळ।
टाबर रमै गांव रा
डाळै-डाळै लमूट-लमूट
पंख-पंखेरुआं रो आसरो
बाली घणी लागै जाळ।
मरुभोम रा मीठा फळ
जाळ रा जळोटिया
मोत्यां ज्यूं चमकै
गांव रो भाइपो बधावै जाळ।
उकड़-धुकड, डाई-डाई
खेल-खेलणा याद आवै
ठीकरी अर पतां सूं पिंपाड़ी
पीं-पीं कर चढ़ जांवता जाळ।
पसु धन-ऊंठारू अर डांगरा
बूढ़-बडेरा हथायां करता
गांव रो सुख-दुख बांटती
आच्छी घणी गांव री जाळ।
आच्छी घणी लागै जाळ
वाली घणी लागै जाळ
डाळा पसरयोड़ी, लहरां लेवती
गांव रो रूप, गुवाड़ री जाळ।
