म्हूं कांई लिखूं?
म्हूं लिखूं
फगत बै बांता
जकी बिती है म्हारै साथै
जिस्यो जीयो है म्हूं खुद,
जिस्यो जीवण है म्हारो
तो
ओ लिखणो तो कोई लिखणो नीं है,
आ तो कोरी कलम घसीटी है।
तो फैर कांई लिखूं?
लिखूं बै बातां
जिण मांय हुवै
जिस्यो देखण लाग रेयो हूं
म्हारै च्यारूंमैर।
लोगां री अबखाईंया,
भूख सूं कलबळावंता
टाबर,
भूखे पेट
मजदूरी सारूं जांवता
मिनख,
उभाणा पगां
खेत मांयनै काम करता
किरसा,
उघाड़ै डील
भीख मांगता
भिखमंगा,
आप'रै हकां सारू
गिड़गिड़ावतां
दुःखी लोग,
पण इण सूं कांई हुवैलो?
कांई
मिट जावैली सारी अबखांईंया?
भूखा री भूख मिट जावेली?
बिना मजदूरी पेट भरीज जावेलो?
या फैर मिल जावैलो
बो सो कीं
जिण रा हकदार है सारा?
हो सकै है इस्यो कीं ना हुवै।
पण म्हारो काम
आप'रो फरज निभावणों तो है
फेर म्हूं लारै क्यूं हटूं?
म्हूं म्हारो फरज निभावूंलो
लोगा नै चेतावण सारू
आप'रै हक सारूं जगावणनै
म्हूं लिखूं'लो... हां लिखूं'लो...
