सुण त्रिपुर सुन्दरी बाळा, टूट गई म्हारी माळा।
टूट गई म्हारी माळा॥
बिखर्योड़ा मिणियां चुग नै, माळा अेक बणाई।
जपतां पड़्या भरम रा झटका, ढहगी सभी चिणाई॥
पंख कट्योड़ै गिध ज्यूं पड़ियो हाथ हुआ करजाळा।
टूट गई म्हारी माळा॥
जिण आसा सूं दुनियां छोड़ी छोड़्या देव दुवारा।
जिण आसा सूं सरणै आयो, छोड़्या सभी सहारा॥
उण आसा में प्यासो रहग्यो, बीत रह्या बरसाळा।
टूट गई म्हारी माळा॥
भौ नहीं हारूं पण नहीं छोडूं अेक पंथ जो पायो।
जीत्यां जस रा भारा म्हारै, इण सूं सीस झुकायो॥
जे हारूं तो लाज तनै है, दोनूं जूण उजाळा।
टूट गई म्हारी माळा॥
मा म्हारा दोखी है लांठा, रांधै छाती म्हारी।
जुग बीत्या तैं सुध नहीं लीनी, पत जासी तो थारी॥
रखवाळी नहीं कीनी तो म्हनै, कुण कहसी रखवाळा।
टूट गई म्हारी माळा॥
रूप रूप सूं जुग-जुग पूजी, भौ-भौ कारज साज्या।
अेसी कांई चूक माळा में, रंक बण्या है राजा॥
जोत मई तूं जोत जगा दे, तोड़ हियै रा ताळा।
टूट गई म्हारी माळा॥