अट्ठै बात-बात में रंग,
बाजां में मोरचंग,
अठै रामसा पीरां रै संग,
ओ है मिनखां आळो ढंग,
अट्ठै मोटी उडीक थारी ओ मेहमाण।
म्हारी आ ही ओळखाण॥
चौफेरां तेल रा तळा अट्ठै,
अणगिणत-अपरम्पार कळा अट्ठै,
काळ-अकाळ अर लू-लपटां रै बिचै रीतां,
प्रीतां अर गीतां री खाण।
म्हारी आ ही ओळखाण॥
तावङै रा तङका ,
खङताल रा खङका,
ऊँटां रा तबङका,
अर भपंग रा भङका,
चम्पा-मेथी अर ढोला-मारू री आण।
म्हारी आ ही ओळखाण॥
हियो हेताळू अपणापो अणपार,
अट्ठै मनवारां री भरमार,
आयां रो आदर आरती उतार,
अट्ठै मिनख माथा रो मोङ,
अट्ठै मिनखपणे री ऊंची ठौङ,
अट्ठै मिनख ने मिनख री जाण।
म्हारी आ ही ओळखाण॥
