उमर भर फोडा घाले है ऐडा तूं आखर लिख दीनां।
किस्मत में गराबां रै तूं कोरा कांकर लिख दीनां।
चुकाणां करजा लिख दीनां अडाणें गेणां लिख दीनां।
लेणां पर लेणं फेर दी तूं देणां ही देणां लिख दीनां।
आंख्यां में आंसू लिखिया तूं भाग में भाटा लिख दीनां।
नफा में कंजूसी करग्यो घाटा ही घाटा लिख दीनां।
दिवालो दूणों लिख दीनों तूं लिछमी थोडी लिख दीनीं।
जीवणों दौरो लिख दीनों मौत भी मोडी लिख दीनीं।
भचेडा खावणां लिखिया घणां पंपाल लिख दीनां।
आंतड्या बारे लिख दीनीं पेट पाताल लिख दीनां।
भाग में भूख लिख दीनीं खावणां खेल लिख दीनां।
मिनख री जूणं लिखदी तूं डांग पर डेरा लिख दीनां।
फूलचंद नांव लिख दीनों करम में कांटा लिख दीनां।
भेवणों सीधो लिखियो पणं रास्ता आंटा लिख दीनां।
कमाई किस्मत में कोनीं तूं धक्का खाणां लिख दीनां।
तूं बरकत बक्सी ही कोनीं मांगकर ल्याणां लिख दीनां।
हकीकत भूंडी लिक दीनीं तूं सपनां चोखा लिख दीनां।
खावणां बाथेडा लिखिया हर जग्यां धोखा लिख दीनां।
जीतणों मांड्यो ही कोनीं तूं कोरा खेल लिख दीनां।
जलमपतरी में ही आंरे तूं बी पी एल लिख दीनां।
तूं माथो गंजो लिख दीनों ऊपर सुं खाज लिख दीनीं।
तूं तिरणों लिखियो ही कोनीं डूबती जाज लिख दीनीं।
लोगां रे लिछमी लिख दीनी आंरे कंगाली लिख दीनीं।
मरयां पछै मसाणां में तूं लकड्यां आली लिख दीनीं।
तिवाडी भोगना मोटा भाग तूं छोटा लिख दीनां।
पेट तो पूरो लिखियो पणं भरणं रा टोटा लिख दीनां।
