मिगसर- पौ
अर माघ मांय
जद देखूं म्हैं
इण ओळगणी धरती नै
इचरज सूं तिरमिर
हुय जावूं
चौमासै री
तिरसी-तिड़क्योड़ी
बूंद -बूंद सारु
बूकड़ौ मांड्योड़ी
लटपटांवती धरती
काती पछै
हुय जावै
साव सांत
जाणूं म्हैं
तिरस तो अजै ई
अटक्योड़ी है
बीं रै कंठां मांय
पण खूटग्यो है
सिकवा-सिकायतां रो पिटारो
गमगी है अधीराई
पूगग्यो है धीजो
ऊंडो सूंडी तांई
होळै- होळै
जीवण-साच रै कनै
पूगगी है धरती
तिरस सागै जीवणो
सीखगी है
धरती।
