आंख्यां में घुळी अडीक रा सपनां सूं
हिचकी री ओळुवां सूं
पीड़ रो पतियारै सूं अर
उणियारै रै रळियावणै अैसास सूं
कीं तो नातो व्हैला
कीं तो जुड़ाव व्हैला।
पगां री रिमझोळ रो हिड़दै री धड़कण सूं
ऊजलै आंगणै रो कूं-कूं पगलियां सूं
काजळी तीज रौ मैंधी राची हथाळी सूं अर
मांग रै सिंदूर रौ सुवाग सूं
कीं तो जुड़ाव व्हैला
कीं तो रिस्तो व्हैला।
मोर रो बादळां री गाज सूं, बीजली रै पळाकां सूं
बीज रो झूमती फसलां सूं अर
सूरज री किरणां रो अचपळी लैरां सूं
कीं तो रिस्तौ व्हैला।
हां नाता, जुड़ाव अर रिस्ता है
पक्कांयत सगळा प्रीत रै पाण, प्रीत रै परवाणै।
जे नीं होवती रसहीण
अरथ होवतो बेडोळ अर भाव हुंवता लूला-पांगळा।
जठै प्रीत है, स्सो क्यूं है
प्रीत नीं, तो कीं नीं।
