गुलामी री सल्लाड्या सूं निसर’र
सुतंत्रता री सरिता बहावणिया,
म्हारा भारत रा गणतंत्र
थनै म्हारो राम-राम।
बरसां ताईं भागीरथी री धार में
जमुना सुरसत रे भाँत मिलती
न्यारी निरवाळी संस्कृतियां ने
गंगा बणावणियां
म्हारा भारत रा गणतंत्र
थनै म्हारो राम-राम।
जात पाँत अर धर्म कर्म,
पूजा नवाज अर अरदास नें
समता रो कुम्भ बणावणियां
म्हारा भारत रा गणतंत्र
थनै म्हारो राम-राम।
आधी सदी री उमर में
सदियां रा इतिहास ने
आपणा हिवड़ा में भर
नूवां भारत में नूवों समाज सिरजणियां
म्हारा गणतंत्र थनै म्हारो राम-राम।
आज नूवीं सदी रा
कंकू पगलिया थारै आंगणै उभरै
म्हारा सपना थारै ह्वेता कींकर बिखरै
सपना ने सांचो करणीया
म्हारा भारत रा गणतंत्र
थनै म्हारो राम-राम।
