इयां कियां हुय जावै,
पांणी अठै बरसे
अर तळाव
बठे भर जावै!
म्हां लोग
सूखा रा सूखा
होठां पर
तिरस रा तम्बू तांण
आंख्यां सूं धारोळा बैवाता,
चपचाप, थूक गटक
कीकर रैय जावां
इयां किंयां हुय जावै,
बीज अठै बोवां
अर विरख
बठै ऊग जावै!
फेर म्हां लोग
सदियां सू, पीढ़ियां सूं
टकटकी बांध
फळ री आस लगायां
खाली पेट घुरावता
कीकर रेय जावां!
इंयां किंयां हुय जावै
वोट अपणायत नै देवां
अर सरकार
गैरां री बण जावै!
फेर म्हां लोग
बगना हुया
गुलाम ज्यूं
माथौ झुकायां, हाथ फैलायां
पालकी ने कांधौ देता
कीकर रैय जावां।
किण नै दोस देवां
पांणी नै, बीज नै
का धरती, तळाव नै
या फेर
वां नै का खुद नै !
