कांईं काढसी

कुरेद'र

जूनै बगत री

अकूरड़्यां?

कठै लाधसी

शंबूक रो सिर

अेकलव रो अंगूठौ?

राम'र द्रोण

हुग्या जका

आप रै

जुग-धरम रै

परिपेख में

पुरुषोत्तम

नरोत्तम

कांईं हुसी

बां ने कस्यां

आज री

कसौटी पर?

सामलौ काळ

फेर झुठा देसी

नुईं कूंत नै

अर इंयां

कोनी नींवड़ै कदैई

कुंठावां रो

अंतहीण विवाद।

स्रोत
  • पोथी : कन्हैयालाल सेठिया समग्र (राजस्थानी) ,
  • सिरजक : कन्हैयालाल सेठिया ,
  • प्रकाशक : राजस्थान परिषद, कोलकाता ,
  • संस्करण : प्रथम
जुड़्योड़ा विसै