म्हे जद छोटा हा
बात बात माथै
रूस जांवता,
मानता तो मानता
नींस कुटीज जांवता!
कई बार
कुटीज जांवता तो ई
रूस जांवता
मानता ई नीं
लाख मनायां ई!
ठाकुरजी रै भोग ताईं
आई मिठाई
चोर’र खांवता तो कुटीजता
मांगता तो भी कुटीजता..!
पत्थर रै भगवान रै
चढ्योड़ी मिठाई
भगवान तो नीं
हरमेस म्हे ई खांवता
लुक बांट’र
ठाह लाग्या ई
म्हे ई कुटीजता!
पत्थर री देवळी तो
सदां ई इकसार
हांसती रैंवती
मा खानीं अर म्हां खानीं!
