तरेड़ आयोड़ै
म्हारै हिवड़ै मांय
कितरा-कितरा
सिणगार रा सुपनां
रूळग्या!
खिंडग्या कितरा
सीप रा मोतीड़ा!
कितरी बार सजी
अर कितरी बार बिगड़ी...
पलकां म्हारी
आभै सूं कतरी बार
नाखीजगी
धरती माथै!
माण-गुमान री
चावना सूं
काळजो बिंधीजग्यो...
चाऊं घणो सोग करूं
बसड़का फाड’र रोऊं
पण देखूं जद आंगणै कानी
तद धीजो देवै भींतां-
''रो मती भायली!
मांयली बात मांयनै राख
कर दै छिमा बगत नै
कारी लगा’र तरेड़ां नै
आगै री सुधार।''
