इण मरु कनै
जीवण री ऊरमा है
सांसां रो संगीत है,
बळतै-बिसूरतै बांठां री
रिध-सिध धूप है
मै'णत रै परसेवां सूं
तिरस बुझावण री जुगत
अनै बाळू रै कण-कण में
चांदी सो चिमकतौ रूप है
पण उदास है ओ मरु
कै इणरा अंसज
इणरा वंसज
भरी जुवानी सै’रां रै
मरदूद मुसाणां कांनी
भाग रैया है
अनै रेत री रीत
पगडांड्यां री प्रीत
खेत रै हेत नैं
राजपथ सूं
जोड़ण लाग रैया है
पुकारै मरु
आपरै लाड़लै सपूतां नैं
मै'णत अर माटी रै
पूतां नैं
बेकळू रा बवंडर
अर काळी-पीळी आंध्यां
इण री अणसुणी गुहार है
अनै साल-दर-साल रा
छप्पनियां हेला
इण री बेबस पुकार है
