खेत रै
सिंवाड़ै ऊभी निकेवळी जूनी बांवळी
पून रै झौलां सूं
धूजै है बूढ़ी डोकरी सी'क
थर-थर
उण देख्यो है खेत नै खेत
खेत में पून सागै कत्थक करती बांवळ्यां
चुड़खी चरता अेवड़
रेणूता बजांवता अलमस्त अेवाळिया
पूंगी री धुन माथै
धोरां माथै लिटता काळा सांप
के-के नीं देख्यौ उण ईं खेत मांय ऊभी!
फेर उण देख्यो
जिंया-जिंया खेत बंट्यो टुकडां मांय
बिंया-बिंया चाली कुहाड़ती
उणरै बधतै वंश री जड़ां माथै
उमर रै छेकड़लै दिनां नै गिणतां थकां
उण गिण्या खेत रा हिस्सा
उण चितार्या पुराणा दिनां रा चितराम
उण याद कर्यो आपरै वंश नै
उण पूंछ्या गा'लां बैंवता आंसूवां नै
अर भींच ली जाड़!
बूढै बघरै री भांत
बांवळी रोई आपरै कमजोर डील माथै
उपड़ती जड़ां माथै
पून सूं लुळती बेंता माथै
तीखोपण गमाय चुकी सूळां माथै
उणनै ठा है-
मिनख जूण रो विगसाव
अब घणा दिन नीं उभी रैवण देवैला
उणनै ईं खेत री सिंवाड़ै भी।
