बिरमा घड़ी दो पूतळी
इक नर अर दूजी नार
स्त्रस्ट रै पसराव सारू
पण नार री अबखायां
कद ओळखी करतार।
रिसी रो सराप
भाटो बणगी अहिल्या
अगन झाळ उलांघ नै ई
बिजोगण बणगी सीता
पांच रै पांती आई पांचाळी रो
चीर हरण हुयो भरी सभा भड़ां बैठां
गरळ गटकणो पड़ियो मीरां नै
तो सत रै पगोथियां चढगी सतियां
मरजाद मिनख री राखण।
कळजुग में बधगी कळप
बिरमा री आं पूतळियां नैं
दायजै दानव दबाय दी
तो कदैई ओळभां ऊरबा
कोरै काळजै डांभ ज्यूं लागा।
अधरमी अन्यायी राकसड़ा
उछरिया धरा पर अणमाप
जिका कद उधेड़ दै इणरो अस्तित्व
लोहीझाण करदै इणरी आतमा
देखां सुणां हां...
बाज री जाड़ फसी चिड़कली ज्यूं
अबोध आतमावां नैं
किच्चरघाण करदै दुस्टी।
डाकीचाळो बापरग्यो
जुग री जाजम माथै
ओपरी निजरां, ओपरा आखर
ओपरा लोगां री
कद भख बण जावै
स्यात ईसर ई नीं जाणै!
किणी री धीवड़ी
किणी री बैन
किणी रै काळजै री कोर
किणी री मां, किणी री बेटी
पीढियां पोखती आई
आ ईज नार जुगां जुग सूं
पण...
कुण रुखाळै, कुण पंपोळै
इणरै मांयलै मरम नैं
भख रा भूखा भेड़ियां आगै
हूगी आ निरजोर।
हमै...
ईसर सूं करती अरदास
इण भव बणाई तो बणाई
आगलै भव भलांई
कीड़ी कमेड़ी चिड़ी
कीं ई बाण दीजै
पण मत बणाइजै अैड़ी नार।
