चेतो चेतो सारा चेतो
मिनख-लुगायां सारा चेतो
हक-हिस्से रै खातिर चेतो॥
डायन बाको खोलै बैठी
सारां नै गटकावै हे
कदै के लागे मीठी-मिसरी
कदै सरपणी बण जावै है।
भोला-भाला लोग मुळक रा
आ अटकल नीं समझ पावै है
सगला सैणा-सूणां चेतो
टाबर अर बुढ़िया चेतो
हक-हिस्से रे खातर चेतो।
भूख इयेरी भीम सरीखी
तिस द्रोपदी-चीर-सी
मंतर-जंतर सारा सिध है
मिनख जूण में भूतणी-सी
इनै मूठ कियां कोई मारे
आ तरकीब सुझाओ
काम करणिया सारा चेतो
भणियां-गुणियां सारा चेतो।
घर री रोटी खुदरी टोपी
बिन लड़या कोनी मिलसी
हक-हिस्से रे खातिर भाई
गांव-गली लड़नो पड़सी
सारा एक सरीखां हुयो
भूत भागतो जासी।
असल बात लडयां सूं आसी
हीयां खोरों सारा चेतो
किरांती किरणिया सारा चेतो
चेतो-चेतो सारा चेतो
हक-हिस्से रे ख़ातिर चेतो।
