आज रेलगाडी में
सफर करती बगत
बीं गांव रो अेक आदमी मिल्यो
जकै में म्हैं कोई
चाळीस-पैंताळीस साल पैली
सालखंड मास्टरी करी ही!
बीं गांव में म्हैं
मुड़’र कदी नीं गयो हो
बीं सूं मिलणो
अेक तरै सूं
बीं गांव जाणो-सो होयग्यो...
म्हैं बीं नै, बीं रै गांव में जावण रो
सन् बतायो
केई जाणकारां रा नांव बताया
केइयां री तो आपरै मोबाइल सूं
फोटूवां ई दिखाई,
उण पुराणै जमानै आळी फोटूवां ई
आपरै मोबाइल में कैद कर राखी ही!
नूंवी तकनीकां सूं जुड़यै
बीं माणस रा विचार ई नूंवा हा
उण आपरै बेटै रै ब्यांव में
टीको नीं लियो
बहुवां सूं ई ओलो-पल्लो नीं करावै
बीं री दुकान करण रा
काण-कायदा भी फूठरा हा...
इयां तो दुनिया
आछै-आछै मिनखां सूं भरी पड़ी है
पण बीं सूं बी सीखी जा सकै है
केई आछी बातां।
