माथौ गोल मटोल रेंतो बिच में रेंती चोटी।
दूध दही रा ठाठ रेंवता घी में गचगच रोटी॥
सबाणं तेल री कठै जरूरत नाडी पर न्हायांता।
कपडा झिबल सुखाय लेंवता खंखोली खायांता॥
आठानां रा पाव भडा म्हैं खडा खडा खायांता।
पगरखी में पाणीं लेकर दो नंबर जायांता॥
लूट लूटकर मांझो ल्यांता पछै लगांता गांठां।
पाठा फाड पतंग बणांता बो काटा बो काटा॥
चौमासा में बिरखा आंती खोल भगांता गाबा।
नंद धडंग नाचता गांता मेह बाबा मेह बाबा॥
पाटी भडता पौथी लेकर पोसालां में जांता।
गुरूजी नें देख आंवता म्हैं मिनक्यां बण ज्यांता॥
कान पकडकर मुरगौ बणता ऊपर पडती लातां।
टाट पट्यां गीली कर देंता याद आवे बे बातां॥
इचकदाणां बिचकदाणां गांता फिलमी गाणां
बारै बांडायां कर लेंता घर में स्याणां स्याणां॥
लारै डब्बा बीस लागता खुद इंजन बण ज्यांता।
सिंगल री परवा नीं करता छुक छुक रेल चलांता॥
गुदडां में लुटता हंसता अधगेला हू ज्यांता।
आडा टेढा पसता पसता दस भेला सो ज्यांता॥
तिरसिंहजी सुं डरता कोनीं बिना बात भिड ज्यांता॥
भाटौ भार भागकर मां री गोदी में भड ज्यांता॥
रेत मांयनें रामत हूंती दिनभर मौज मनांता।
न्हाय धोयकर घर सुं जांता भूत बण्योडा आंता॥
सदा सुरंगा दिन हूंता हा सदा सुहाणीं रातां।
तिवाडी तो बो ही है पणं कठै रिवी बे बातां॥
