कदै विचारू
म्हूं जीवती इण बळीता री वज्या सूं हूं
ढांडा ढोर अर खेत रो काम करता
जद चुल्हौ चैतावा री चिंता सतावै
चुल्हा वास्तै बळीतो भेळो करूं
चुल्हो
अर आटो व्हेता तका भी
वगर बळीतो रोटी कोनी वण सके
रोटी इण बळीता री वज्या सूं इज
जलम लेय सके
वगर बळीतो रोटी आटो ईज रैवे
ईं तरया
कदै म्हैं भी विचारू
म्हूं बी जिवती ण बळीता सूं ईज हूं
बळीतो
जो इण जीवा जूण री
संगळी मुसीबतां
सूं म्हने लडवा री ताकत देवे
ज्यूं राखोडा रा मांयने नान्ही चिणगारी
इण बळीता री मदद सूं ईज
लाय रो रूप धर लेवे
आ लाय
म्हारा मांयने बी
जीवती पण बळीता सूं ईज है।
