भूदेई चीणां रो आपरै मूं में लोधी बणा 'र
म्हारै मूं में घाल देंवती ही बाई।
डोकी छोलण सूं म्हारी आंगळी कै होठ कट नीं जावै,
छोल-छोल पोरी देंवती ही बाई।
काची निम्बोळी सूं मूं खारो नीं होवै म्हारो,
पाकी री पिछाण करांवती ही बाई।
मीठी अर फीकी कुणसी होवै डोकी
पत्तां री लकीर सूं पढावती ही बाई।
खुळेड़ी मतीरड़ी रा बीज सगळा काढगे
मीठो-मीठो पाणी प्यांवती ही बाई।
बाजरी री कुत्तर सूं डंकोळी जद चुगतो
दोनां रो भेद बतावती ही बाई।
बेरो कोनी होंवतो कच्छी उळटी-सुळटी रो
सूंई करगे कछड़ी पै 'रांवती ही बाई।
चंपलां रो पग जद भूलतो हो म्हैं
सागी-सागण पग में पै 'रांवती ही बाई।
खेत री राह में गोदी जद मांगतो
सारी दूर पधि्धयां चढांवती ही बाई।
जद-जद करतो कछड़ी नै गंदी
ताते ताते पाणी सूं धुवांवती ही बाई।
बात-बात सट्टै रुसती हैं बीं सूं
कसूर म्हारो होंवतो, मनांवती ही बाई।
लदग्या वै दिन अब पाछा कोनी आवै
पाछा तो ले आंवती होंवती जे बाई।
