बगत बगत री बात रै भाया!
हूं म्हारी तूं थांरी में
बगत बीततां देर ना लागै
लारै मुड़’र देखां सुपना
सगळा रैंता सागै
ढाळ जांवतै पांणी नैं
देखां, फेर न भरमाया
बगत बगत री बात रै भाया!
बाबा बड्डा रिस्ता रिसग्या
पून ओपरी बैगी
अपणैपण रै ओटै में
मजहब री इल्यां रैगी
धन धरती रै लालच में
भाई-भाई अळगाया
बगत बगत री बात रै भाया!
नै’र किनारै दरखत हा
करग्या करग्या मोडी
सूनो गैलो छाया ठंडी
सोरी चालती टोडी
नई नई योजनावां में
अबै छुपगी बोदी काया
बगत बगत री बात रै भाया!
