आपां रै नांव सूं
वै मूंडा मचकोळै
पण चलावै है सैं कारोबार
आपां रै नांवै
सालौसाल कतरै केस
मनावै उच्छब
ढोल रै ढमकै
अर आपां
राजी-खुसी सीस निवाय
करां वांरी जै-जैकार
मां-बाप!
आप हौ-
रोटी-बाटी रा देवाळ
धरम री धुजा
करम रा किरतार
समझां-जीवण
बेवै है ढाळौढाळ
आपां रा नांव उपनांव
कठैई कोरीजै नीं मंडीजै
पण गाईजैला गीत
आपां री बिड़दावळी रा
दिरीजैला आपां री मिसाल
पण निजू कीं नीं व्हैला
म्हारौ-थारौ-उणरौ
आपां री पैचाण बस व्हांला
फगत आपां
रोपीजैला आपां री ओळूं री थांबलियां
जठै दो घड़ी मून धार
अेक मजमौ करैला आपां रौ बखांण
आख्यातां री अैद उठा’र
उछाळीजैला नारा
सराई जैला आपां रा घाव
अर बगत री मार सूं
घायल व्हियोड़ी आपां री औलादां रा चैरा
करैला पळपळाट
बुझती जोत री लौ दांई
अर फेरूं
जीवण री अबखायां सूं जूझण सारू
व्है जावैला त्यार
देस नांव रै जजबै रै सैनांण
व्है जावैला बलिदांन
आपां रै उनमान
फेर कोई बौपारी
खोलैला दुकान
लेय’र सरकारी अनुदान
आपां रै नांवै।
