छंटियो जरूर
काळो दराख अन्धारो-अमूजो।
हाथ नै हाथ सूज्यो
सूज्यो जरूर हाथ-हाथ नैं
पण-बूज्यो की....नीं?
अर पाछै
खावण लाग्यो एक दूजे नैं
आंख्यां रो अन्धारो
मिटियो जरूर
पण की करूं-ईये लोइन्दे रो
जिको फैल रैयो है च्यांरू मेर
अर बैवण लाग री है भैड्यां
सागी पगडान्डी फेर
कान अर मून्डै में
हुई जरूर
पाछी जाणै सुलबुलाट
पण आखर
लकबै मारियै अंग ज्यूं
लटक'र रैयग्या अधबिचालै
आंगरणे सूं ले'र
पगडान्डी अर सड़क तांई
गूंज रेई है भड़भड़ाट
बाज रैई है
च्यांरू मेर-खंखाट करती नागोरण
ठाली भूली ठिठकारियोड़ी
बाळ रैई है रूं-रूं
आ बाळनजोगी नागोरण
मोरिया म्याओं-म्याओं
अर चिड़कल्यां
चूचाड़ करण नैं
घरणी चूच्यां खोले
पण बोलै तो-कियां बोलै
नागोरण री खैं-खैं
जलपखां री आंजू तांई
बैठी छाती छोले
नीं हुई बरखा
नीं बैया बाळा
नीं हटी बोदी धूड़ अर धेंसल
नी मिटिया जाळा
कियां बण-
नूवीं पगडान्डी?
आखर कद पैरसी
केशरिया कसूम्बल पाग्या
भदर हुयोड़ा-
म्हारै जीव सूं प्यारा
म्हारा रूंख?
