पग दबावां मानखै रा पीड़ नै जाती करां
प्रीत मन रा आळियां में गावती आती करां
गी कठै संवेदना हिरदो हुतो पासाण क्यूं
इण अंधारी कोटड़ी में बरफ नै ताती करां
व्ही तिसाई आज रोही डाक देवै कागला
अेक पंछी कूकतो मन राग नै गाती करां
सै बडेरा लोग कहवै काळ चाकी खोड़ली
लुळ बधावां मान इणरो माघ नै काती करां
बारणै जा मत भचीड़ै सांकळा थूं भाईड़ा
थस हिया री ओवरी अणमावती माती करां
राज नागो चांइला गुळचोपड़ी बातां करै
आंख चोगां, आंख नांखां, आंख नै राती करां
रात काळी आज थारो सायरो 'मोहन' कठै
आस मुळकै दीप उजळै हरख सूं बाती करां
