म्हांकी मंसा कागद कुरळै सबदां रोबो कर लैवां
आंख डायजै आंसूड़ां री माळा पोबो कर लैवां
व्हांकी आंख्यां खटकै म्हांकी दो रोट्यां रो सुख सारो
निबळाई में आयां पाछै ऊंचो होबो कर लैवां
ऊणै खूणै राफड़रोळ्या जैपुर-दिल्ली हाळां रा
कांकड में घरबासो म्हांको आंख्यां छोबो कर लैवां
बीज बिखेरै कुटळायां रा नागापण रा सोटा लै
फर-फर नेतावां रा वादा मूंडै बोबो कर लैवां
नित नागां रै नौपत बाजै रामधणी री किरपा सूं
माथै बांध मडांसो फैरूं आगै धोबो कर लैवां
काळ कड़ाका करै कड़ाकड़ कांच-कांगसी कीं करसी
बेच नींद रा सुपणा सगळा रात्यूं सोबो कर लैवां
बैठ चितारै झूपां मांही 'मोहन' थांकी राधाजी
मांड खुरड़को हिरदा मांही माथै घोबो कर लैवां
