Quick Links

खड़ताल मजीरा है ‘के नी?

भगतीरत मीरा है ‘के नी??

धन्ना पुरखा सबरी करमा—

नरसी ‘र कबीरा है ‘के नी?

वे नामदेव अर सेण भगत—

भाटी हरजी रा है ‘के नी?

वचनां रा बांध्या आण मरे—

तेजाजी वीरा है ‘के नी?

डिगरीधारी है अठे घणां—

पण प्रेम—भणीरा है ‘के नी?

रीता सरवर, पोला मंगरा—

मोती अर हीरा है ‘के नी?

मन देख कैक्टस फूले पण—

हळदी ‘ने जीरा है ‘के नी?

दन पे दन घटता—घटता ई—

इस्कुल हिंदी रा है ‘के नी?

स्रोत
  • पोथी : फूंक दे, फूंक ,
  • सिरजक : पुष्कर ‘गुप्तेश्वर’ ,
  • प्रकाशक : बोधि प्रकाशन ,
  • संस्करण : प्रथम संस्करण