इण आस में जीणो पड़ै संसार बदळसी
ओ साव वैंडो आदमी व्योहार बदळसी
बीत्या जुगां सूं जद कदी करसी ओ बतळावण
इण आदमी रो अेक दिन किरदार बदळसी
झगड़ो फसाद, जुद्ध सूं कीं नीं हुवै हासल
दुनियां नैं बदळसी तो फगत प्यार बदळसी
समदर में बवंडर में घिर्योड़ी नाव रो मारग
नाविक रै सबळ हाथां री पतवार बदळसी
जिन्सां हुई मूंगी घणी जीवण घणो सस्तो
बैठा उडीकै मिनख कद बजार बदळसी
हारतो ई जा रह्यो हर मोरचो इनसान
पण है भरोसो 'लाल' नैं आसार बदळसी
