सब का दोष बखाण भायला
पण खुदनै मत जाण भायला
जाण की नींद उडा’र चैन सैं
सो जा खूंटी ताण भायला
पलकां मीच पळक लै मछळ्यां
मत चूकै चौहान! भायला
किरकांट्या-सी रंग बिरंगी
छिब कुण सकै पिछाण भायला
रावण ज्यूं हंस-हंस डकार जा
रिसवत रूपी बाण भायला
हरि को भजन पेट को धंधो,
कर समाज कल्याण भायला
चकरासी जितरी चिमकासी
या दुनियां छै साण भायला
लोही तो अणछाण्यो पी जा
पण पाणी तो छाण भायला
चमचा चमच्यां सैं रचवा लै
बुद्धिप्रकाश-पुराण भायला
