आ रे म्हारा बेली सप्पम-पाट
मैं तन्नै चाटूं तूं मन्नै चाट
बीं दिन री मैं जोऊं बाट
दिन उगसी बीतैली रात
छपनै सिरसो समय बितावां
ठाठ-बाट रा ढ़ोंग रचावां
गुण आजादी रा लुळ-लुळ गावां
बिना तेल म्हे दियो जगावां
अंधियारै नै मार भगावां
म्हे म्हारै दिवलै री जोत जगावां
बीं दिन री मैं जोऊं बाट
तेल ना बाती थारी हाट।
आजादी रा आक चबावां
खारै नै मीठो कर खावां
छाज चालणी नां रळकावां
अण चुगियो अळियो ही खावां
काबा, कासी भाज’र जावां
कद रो ऊभो जोऊं बाट
कद फूटैली थारी माट
बीं दिन री मैं जोऊं बाट।
इण जीवन में सुख-दुख आंटा
एक में फुलड़ा दूजै कांटा
सुख सावण रा कदै ना छांटा
पग-पग कांटा, घर-घर फांटा
बेल तरसगी सरवर घाट।
सुण म्हारा बेली सप्पम-पाट।
पीड़ा पळी सुखां रै लारै
सुख पळसी पीड़ा रै पाण
मन मत मार मरै लो जीवन
जावेली अब थारी काण
कठै आजदी-कद बा लाधी
छोड पुराणी बाण कुबाण
बात ढूकगी हाणो-हाण
बीं दिन री मैं जोऊं बाट।
दिन उगसी बीतैली रात।
