मौत तणी गोदी में खेलै, नैनी-सी जिनगानी।।
ममता री मूरत सूं डरपै, मौत भवानी-माता।
लाड-लडावै, पाळे-पोखै, सब री भाग्य-विधाता।
जूण गीगली-जिलफ, उणी रै आंचळ दूधो चूंघै।
कर्मगीत री लोरी गा-गा, सदै ताळवो सूंघै ।
जिणनै कैवै जूण-खोसणी, बा है अवढर-दानी ।
मौत तणी गोदी में खेलै, नैनी-सी जिनगानी।।
भोळी जिनगानी के जाणै, डूंगी घणी पहेली।
इचरज करती फिरै जगत में, गूंगी ग्यान-सहेली।
पतियारै-पितवाणै, जाणै, भेद-भरम री भासा ।
पूरणतायी में परखीजै, परमतत्व, परिभासा।
जलम-मरण रै बीच ठौड जो, बा प्रभु री मिजमानी।
मौत तणी गोदी में खेलै, नैनी-सी जिनगानी।।
कचकोळ्यां, गळगचिया भेळा करै, गुढ्याळो खेलै।
नैणमोवणा रूप-रंग नै, ल्हुको-ल्हुकोनै मेलै।
बोछरड़ी है घणी टींगरी, मेळां में गम जावै।
साथण-सायेन्यां में बैठ'र रोळां में रम गावै।
सासरियै जांवतड़ां होवै, स्याणी, झट नादानी।
मौत तणी गोदी में खेलै, नैनी-सी जिनगानी।।
आळीभोळी अजब टींगरी, जाणै निज नै स्याणी ।
पाणी रा बुद्बुद् में, जिनगानी री राम-कहाणी।
हर पल मौत रुखाळै, माता री ममता बुचकारै।
जाण-बूझ अणजाण बणी, जिनगानी नाय बिचारै
वेद-सासतर कथग्या सारा, पण ना कोई मानी।
मौत तणी गोदी में खेलै, नैनी-सी जिनगानी।।
