मन री बातां जाणी के,जाणी तो अणजाणी के
बूढी मा रै काळजियै री पीड़ा कदै पिछाणी के!
तूं जद भी घर सूं निकळै तो कितरा देव मनावै बा
झुळक-झुळक बाटड़ली जोवै,पल भर चैन न पावै बा
पण तूं पाछौ आयां बीं सूं बोले मीठी वाणी के
बूढी मा रै काळजियै री पीड़ा कदै पिछाणी के!
थारै चेहरै रा भावां नै परखै छांनै ओलै बा
खुद रो दरद छुपावै मन में,थां सूं हंसकर बोलै बा
बीं रै नैणां में निरख्यो तूं गंगाजी रो पाणी के
बूढी मा रै काळजियै री पीड़ा कदै पिछाणी के!
बीं रै बैठ्यां थारै घर री शोभा साख सवाई है
बीं रै हाथां में ई थांरी बरकत करै कमाई है
बीं री ई पुण्याई थारी जिंदगाणी, समझाणी के
बूढी मा रै काळजियै री पीड़ा कदै पिछाणी के!
समझै तो सारा तीरथ है बीं रै पावन चरणां में
जे बीं रो मन राख न पावै ,कसर नहीं है मरणां में
बा ई गीता बा रामायण बाकी कथा कहाणी के
बूढी मा रै काळजियै री पीड़ा कदै पिछाणी के!
