मरुधर री सोनळ माटी नै आज सजावां रे
मंगळ गावां, मोद मनावां, रूंख लगावां रे
***
केर, कूमठा, खेजड़ल्यां धरती रो खूंटो है
धरती हरखै, मुळकै इण रो बूंटो - बूंटो है
हरियल - राजस्थान बणै आ मनड़ै धारां रे
गांव - गळी घर - घर में सहजण रूप अनूठो है
पारिवारिक वानिकी री आ बात बतावां रे
मंगळ गावां, मोद मनावां, रूंख लगावां रे
***
रोहीड़ो रोही रो राजा बात निराळी है
जाळ, नीमड़ा, टाल्यां री सुंदर हरियाळी है
मरुधर रो गै'णो - गांठो रूंखां नै मानो रे
हरी बेलङ्यां करै कढाई घणी रुपाळी है
पर्यावरण री पाठशाला में पढ आवां रे
मंगळ गावां, मोद मनावां, रूंख लगावां रे
***
दिन - दिन पारो बढतो धरती भट्टी बणगी है
धूंवैं री आभै में गुधळी चादर तणगी है
बिन रुंखां रै सूखा धोरा रेत उडावै रे
तपती रै कारण धरती री छाती छणगी है
हरित - राजस्थान री आ अलख जगावां रे
मंगळ गावां, मोद मनावां, रूंख लगावां रे
***
आओ सगळा हाथ बढावां रूंखां रै खातर
माटी रो कण कण हुळसावां रूंखां रै खातर
रूंख सटै सिर कटवायो इण माटी रा जाया
आपां ई कीं कौल निभावां रूंखां रै खातर
सहजण ही सहजण सूं घरघर आज सजावां रे
मंगळ गावां, मोद मनावां, रूंख लगावां रे
