कुदरत रै बागा में उगती—सी जिनगाणी।
सपना री गळियाँ में भमती—सी जिनगाणी॥
माटी री मूरत ज्यूं रमती—सी जिनगाणी।
सांसा री तणियां ज्यूं तणती—सी जिनगाणी॥
रेशम री गांठा ज्यूं घुळती—सी जिनगाणी।
सूखी—सी लकडी ज्यूं सुळती—सी जिनगाणी॥
समदर री ल्हैरां में तिरती—सी जिनगाणी।
अंजळी रै पाणी ज्यूं ढळती—सी जिनगाणी॥
रतनां री ढेरी ज्यूं पळकै है जिनगाणी।
मोत्यां री झालर ज्यूं झलकै है जिनगाणी॥
हिवड़ै रै होठां में मुळकै है जिनगाणी॥
जोबन रंगरळियां में रळकै है जिनगाणी॥
पांखी री पांख्यां में उडती—सी जिनगाणी।
आंधी सूंसाटां में लड़ती—सी जिनगाणी॥
संकड़ी—सी घाटी मेंअड़वड़ती जिनगाणी।
आसा रै बागां में मुड़ती—सी जिनगाणी॥
सावण रै झूलां में झूलै है जिनगाणी
फागण रै गीतां में नाचै है जिनगाणी॥
चांदी—सी रातां में चकमक—सी जिनगाणी।
सुख री मनवारां में भूली—सी जिनगाणी॥
मैंदी रै हाथां—सी राचै है जिनगाणी।
नैणां री पाती नै बांचै है जिनगाणी॥
सपनां री ढगर्यां में भाजै है जिनगाणी।
पिणघट रै गीतां में लाजै है जिनगाणी॥
नींदा रै गुटकां में निरखै है जिनगाणी।
मिसरी—सी बातां में हरखै है जिनगाणी॥
कुरजां री बोली में तड़पै है जिनगाणी।
बीजळ रै झपकां में झपकै है जिनगाणी।
काजळ—सी रातां में खोवै है जिनगाणी।
बादळ री बूंदां ज्यूं रोवै है जिनगाणी॥
यादां रा मोतीड़ा पोवै है जिनगाणी।
हिरणी ज्यूं मारगियो जोवै है जिनगाणी॥
लूवां री झपटां में कळकळती जिनगाणी।
जीवण रै झपटां में खळभळती जिनगाणी॥
माणस रै हीरां नै छळती—सी जिनगाणी।
अधबळियै खीरां में बळबळती जिनगाणी॥
बांचणिया बांचै कै परखण—सी जिनगाणी।
सुख—दु:ख नै जांचै कै उबटण—सी जिनगाणी॥
मनड़ै रै गीतां में सुमरण—सी जिनगाणी।
पतझड़ री पलकां में सिरजण—सी जिनगाणी॥
