तनै टेवटौ घड़ादयूं
तनै पैजणी पहरादयूं
तनै बाजूबंध ल्यादयू, मेरै फूलियै री मा
नागौरी-बळदां नै बेगी पांणी पाय'र ल्या
तनै कांगसी मंगादयूं
तनै आटी-डोरा ल्यादयूं
माथै हींगळू लगादयूं, मेरै फूलियै री मा
करां हळसोतियौ तूं छाक लेय'र आ
तनै अंगरखी सिंवादयूं
तनै कांचळी मंगादयूं
तनै घाघरौ रंगादयूं
पीलो पोमचौ बंधादयूं
ऊपर मोरिया छपादयूं, मेरै फूलियै री मा
कसिया-गंडासी मेरै हाथ देती जा
तनै बिछिया घड़ादयूं
दांतां चूप चिमकादयूं
मोत्यां बोरलौ जड़ादयूं मेरै फूलियै री मा
नागौरी-बळदां नै बेगी पांणी पाय'र ल्या
तनै टेवटौ घड़ादयूं
तनै पैजणी पहरादयूं
तनै बाजूबंध ल्यादयू, मेरै फूलियै री मा
नागौरी-बळदां नै बेगी पांणी पाय'र ल्या
