हरियाळी हाड़ावती जी
म्हांकी हरियाळी हाड़ावती
चांबल धारा चुर-मुर चुर-मुर य्हां कळोळ्यां करती
इन्द्र देव की बादळ्यां य्हां पगतळ्यां धरती
तारागढ़ तारो सो लागै, बूंदी छै नखराळी जी
झील मीन मं छायां दीखै लागै घणी रूपाळी जी
बावड्यां को पाणी बायर नतकै लैबा जाती जी
भींता पै चितराम उतर्यां
भींता पै छै राम उतर्यां
नरखैं आती जाती जी।
हरियाळी हाड़ावती जी
म्हांकी हरियाळी हाड़ावती।
कोटा-बूंदी मं महाराव अर झालावाड़ मं राजराणा
तप कर’र तकदीर मांडै य्हां का करसाणां
नाड़ काट दे हाड़ी राणी हो जावै महान जी
देस परेम कै खातर कुंभो दै देवै बलदान जी
सुरग सुन्दर्यां झांक मुळकती
फूलां न बरसावती
हरियाळी हाड़ावती जी
म्हांकी हरियाळी हाड़ावती।
लाल सुर्ख कैसुला करावै आंख्यां सूं अमरत पान जी
गागरोण को किलो हरसतो जळ मं राखै थान जी
कोटा को दसहरो अर बारां का छै ढोल जी
सांगोद मं न्हांण अर पाटण मं रमझौळ जी
हंसणी झरणां मं न्हांती
हंस सूं बतळावती
हरियाळी हाड़ावती जी
म्हांकी हरियाळी हाड़ावती।
तरां-तरां की नद्यां नतरै भौळा की जटा सूं जी
भरमण करबा आवै जातरी दैख य्हां छंटा सूं जी
आम आमल्यां बोर नारंगी सांटा रस की खान जी
सरसूं सोयाबीन गेहूं मक्का होवै छै मनमान जी
दाळ-दपाळ्यां दळती दादी
गीत गाळ नैं गावती।
हरियाळी हाड़ावती जी
म्हांकी हरियाळी हाड़ावती।
