मन रा अबलख घोड़ तूं दौड़ दड़बड़ां
खुल्ला पड़िया खोड़ तू दौड़ दड़बड़ां
दड़बड़ां दौड़ दड़बड़ां
पी लै पोखर पाळ मिलै जितौ ई पांणी
तकसी कितरी ताळ अरे थोड़ी जिंदगांणी
पुट्ठा रै परवांण नाप लै नाप अलेखां
पोड़ां-पोड़ उघाड़ घरा में गडी हेमांणी
बंधी लगामां तोड़ तूं दौड दड़बड़ां
दड़बड़ां दौड़ दडबड़ां
खुद री खाल तपाय के खुद रा खेत मिळैला
जुध रौ भाव जताय के हेत समेत मिळैला
नासां सांस हिरोळ जीत रा गीत उगीजै
हांफळ न डफळीज के केई कुमेत मिळैला
मच री होडाहोड तू दौड़ दड़बड़ां
दड़बड़ दौड़ दरबड़ां
आखड़ जे मत भूल हाल तो मंजल आगो
भरमा में मत झूल सोवै जग पण तूं जागी
ऊंची भाखर-भोम पंथ में खाड घणेरा
सूळ मिलै के फूल जाव लग जाजे भागी
घेर-कूंडिया छोड़ तू दौड़ दड़बड़ां
दड़बड़ां दौड़ दड़बड़ां
पायल री झणकार नाच रा ढोल सुणैला
मदझीणी मनवार मिलण रा कोल सुणैला
जे जासी तूं जीत जगत री अबखी बाजी
घर घर बानरवाळ गीत रा बोल सुणैला
अब नै आगे जोड़ तूं दौड़ दड़बड़ां
दड़बड़ दौड़ दड़बड़ा
वै जुग रा झूंझार सुरज रै साथ तपीजै
गजमोती गळ हार मांन रा थांन थपीजै
राखीजे करड़ांग समझजे सब नै निबळा
सबळां री पहचांण मौत सूं रास रमीजै
मारग-मजलां मोड़ तू दौड़ दड़बड़ा
दड़बड़ा दौड़ दड़बड़ा
