आई-आई अे सावण गी तीज सावण गी तीज
तीजां नै बेटी अे मां मेरी सासरै
और सखी अे मां मेरी हींडण जा अे हींडण जा अे
मनै तो दियो झाबलो पीसणो
तोड़ू-तोड़ू अे मां मेरी घटूली गो पाट घटूली गो पाट
अगड़ै खींडाऊं अे मां मेरी पीसणो
आयो-आयो अे मां मेरी गायां गो ग्वाळ गायां गो ग्वाळ
चुग-चुग चाबै अे मां मेरी पीसणो
सांधू-सांधू अे मां मेरी घटूली गो पाट घटूली गो पाट
अगड़ै बुहारूं अे मां मेरी पीसणो
पीस्यो-पीस्यो अे मां मेरी मुरचै गै जोर मुरचै गै जोर
पीस’ज पोई अे मां मेरी रोटियां
पछलो तो पोयो अे मां मेरी रोटीयो मां मेरी रोटीयो
छेकड़ गो पोयो अे मां मेरी रोटीयो
आयो-आयो अे मां मेरी पीवरियै गो काग पीवरियै गो काग
ले’गे तो उडग्यो अे कागो रोटीयो
लेज्या-लेज्या रे पीवरियै गा काग पीवरियै गा काग
जा’गे दीखाई मेरै मोबी बीरै नै
उठ्यो-उठ्यो अे बीरो मेरो ढळती सी रात ढळती सी रात
दिनड़ो तो उगायो अे आपगी भैण गै
बूझै-बूझै अे बीरो मेरो मनड़ै गी बात मनड़ै गी बात
दौरो क सौरो अे बाई मेरी सासरो
दौरी रे बीरा मेरा चौमासै गी आग चौमासै गी आग
दौरो तो जौवां गो बीरा मेरा पीसणो
आग’ज बाई मेरी सिणीयै ऊं बाळ सिणीयै ऊं बाळ
जौ अे सुखाओ बाई मेरी तावड़ै
दौरी रे दौरी रे चौमासै गी दूब चौमासै गी दूब
दौरो तो जेठां गै सागै चालणो
दूब’ज बाई मेरी कस्सीयै ऊं खोद कस्सीयै ऊं खोद
जेठां तै काढो अे गज गो घूंघटो।
(संदर्भ – सासरै में बेटी रो सावण री तीज अर आपरी सखीयां री ओळ्यूं में पीहर सूं बीरै नै बुलावण रो गीत )
