काळौड़ी अे कांठळ ऊमटी ओ पिणियारी जी अे लो
मोटोड़ी छांटां रौ बरसै मेह म्हारा वाल्हा जो
भरिया नाडी अर खाबड़ा अे पिणियारी जी अे लो
भरियौ-भरियौ समंद तळाव म्हारा वाल्हा जो
किण जी खुदाया नाडी-खाबड़ा अे पिणियारी जी अे लो
सुसरौ जी खुदाया नाडी-खाबड़ा अे पिणियारी जी अे लो
सायब जी समंद तळाव म्हारा वाल्हा जो
किण सूं वधावां नाडी-खाबड़ा अे पिणियारी जी अे लो
किण सूं वधावां भीवं तळाव म्हारा वाल्हा जो
नारेळां वधावौ नाडी-खाबड़ा अे पिणियारी जी अे लो
मोतीड़ां वधावौ भींव तळाव म्हारा वाल्हा जो
सात सहेल्यां रै झूलरै अे पिणियारी जी अे लो
गई-गई रे समंद तळाव म्हारा वाल्हा जो
घड़ौ नीं डूबै बेवड़ौ अे पिणियारी जी अे लो
ईंडाणी तिर-तिर जाय म्हारा वाल्हा जो
बीजोड़ी सहेल्यां बावड़ी अे पिणियारी जी अे लो
रंग राणी रही रे तळाव म्हारा वाल्हा जो
पग रे धोवूं पगौतियै अे पिणियारी जी अे लो
अगूंणी दिसा सूं ओठी आय म्हारा वाल्हा जो
पाळ चढ़तां राजवी लंजा ओठी जी अे लो
म्हनै भरियौ माट ऊंचाय म्हारा वाल्हा जो
भरियौ माट नीं ऊँचै अे पिणियारी जी अे लो
थूं आधौ कर ऊंचाय म्हारा वाल्हा जो
आधौ माटो झबझबै लंजा ओठी जी अे लो
भीजै म्हारै साळूड़ा री कौर म्हारा वाल्हा जो
औरां रै ओढण चूंदड़ी अे पिणियारी जी अे लो
थारोड़ौ विरंगौ वेस म्हारा वाल्हा जो
औरां रे काजळ-टीकियां अे पिणियारी जी अे लो
थारौड़ा फीका नैण म्हारा वाल्हा जो
औरां रै परणिया घर बसै ओठी जी अे लो
म्हारौड़ै बसै रे परदेस म्हारा वाल्हा जो
कै तौ सासू थारै सुभावकी ओ पिणियारी जी अे लो
कै थारौ पीवरियौ परदेस म्हारा वाल्हा जो
नीं तौ म्हारै सासू सावकी लंजा ओठी जी अे लो
नीं म्हारौ पीवरियौ परदेस म्हारा वाल्हा जो
घड़ौ तौ पटक दै ताल में अे पिणियारी जी अे लो
व्हैजा व्हैजा ओठीड़ा री लार म्हारा वाल्हा जो
बाळू तौ झाळू थांरी जीभड़ी लंजा ओठी जी अे लो
आंख्या में सांभरिया रौ लूण म्हारा वाल्हा जो
चालै तो घड़ावूं थारै वाळलौ ओ पिणियारी जी अे लो
हिवड़ै थारै नवसर हार म्हारा वाल्हा जो
अैड़ा तो वाळलिया म्हारै उबरता पड़िया लंजा ओठी जी अे लो
खूंटी-खूंटी टंगियौड़ी म्हारै उबरता पड़िया लंजा ओठी जी अे लो
हालै तो चिरावूं थारै चूड़लौ अे पिणियारी जी अे लो
माथै ओढ़ावू थानै दिखणी रौ चीर म्हारा वाल्हा जो
चुड़लौ चिरासी धण रो सायबौ लंजा ओठी जी अे लो
ओढणियां ओढ़ासी म्हारौ वीर म्हारा वाल्हा जो
बेवड़लौ भरनै पाछी वळी अे पिणियारी जी अे लो
थूं कठौड़ै लगाई इतरी जैज म्हारा वाल्हा जो
घड़ौ पटक दूं चौक में म्हारा सासू जी अे लो
ऊभौड़ी छिटकावूं चुकलियौ म्हारा वाल्हा जो
कुण थानै दीनी ओ गाळ म्हारा वाल्हा जो
अेक तौ ओठीड़ौ इसौ मिळियौ म्हारा सासू जी अे लो
पूछी म्हारै मनड़ा री बात म्हारा वाल्हा जो
किण जी सरीखौ डीगौ-पातळो अे पिणियारी जी अे लो
देवर जी सरीसौ डीगौ-पातळौ ओ म्हारा सासू जी अे लो
नैनकड़ी नणदल रै उणियार म्हारा वाल्हा जो
औ तौ बवड़ थारौ सायबौ अे पिणियारी जी अे लो
थारौ तौ लीनौ छै इतबार म्हारा वाल्हा जो
लाजै म्हारौ नैनकियौ मांमाळ म्हारा वाल्हा जो
थे तौ म्हारी बवड़ भोळा घणा ओ पिणियारी जी अे लो
वौ तौ थांरोड़ौ भरतार म्हारा वाल्हा जो
जावतड़ा ओठी पाछल फोर लंजा ओठी अे लो
म्हैं तो हालूं रै ओठीड़ा थारै लार म्हारा वाल्हा जो
