मत बावौ म्हारा परण्यां जीरो,
ओ जीरो जीव रौ बैरी रे,
मत बावौ म्हारा परण्यां जीरो।
पाणत करती रा पगल्या रैग्या,
म्हारा कड़ला घसग्या चांदी रा,
मत बावौ म्हारा परण्यां जीरो।
सौ रूपियां री जोड़ी थाकी,
देवर भाज्यो लाखीणौ,
मत बावौ म्हारा परण्यां जीरो।
पीळौ ओढ़ जीरा में चाली,
जीरो पड़ग्यौ पीळौ रै,
मत बावौ म्हारा परण्यां जीरो।
काजळ काढ़ जीरा में चाली,
जीरो पड़ग्यौ काळौ रे,
मत बावौ म्हारा परण्यां जीरो।
लाव चड़स कूआ में पड़ग्या,
नणदल पड़गी खाडां में,
मत बावौ म्हारा परण्यां जीरो।
जे जीरो बावौ तो साजन,
घर में राखौ धीणौ रे,
मत बावौ म्हारा परण्यां जीरो।
