भलां रे बाळा गयौ दिक्खण रै देस, बहनड़ नै आतौ कांई तौ ल्यायौ।
भलां अे बाई, बहनड़ नै ल्यायौ दिखणी चीर, जीजै नै पिचरंग पागड़ी ल्यायौ।
भलां अे बाई, भाणजियां नै फामड़ली चीर, भाणजड़ां मैंमद मोळियौ ल्यायौ।
भलां म्हारी बाई, जीजै नै मुरक्यां कांन, बहनड़ नै झबरक झूंटणा ल्यायौ।
भला म्हारा बीरा, रैज्या तूं अेकण रात, भोजनियां म्हारा जीम तो सरी।
भलां रे बाळा गई मोदीकै री हाट, मोदीड़ा सीधौ तोल तौ सरी।
भलां अे लिच्छु कै आयौ जामण जायौ बीर, कुणां री सिगरथ पांवणौ आयौ।
भलां म्हारा बाळा रांध्या है चावळ भात, साळौ बहनोई जीमनै रह्या।
भलां रे बाळा उजळा चावळियां री खीर, मुट्ठी भर खांड घिरत लेवौ।
भलां म्हारा बाळा, खूंणी में ढाळी ऊंडी खाट, ओरै में बीरा सुख भर सूवौ।
भलां म्हारा सायब, तारां छाई है मांझल रात, परण्यौड़ा म्हारी अरज सुणौ।
भलां म्हारा परण्यां बीरै नै आपां लेवां मार, तो माया आखी आपणै रैवै।
