बाग़ जाईजो बालमा
नींबूड़ा लाईजो चार
ए वळता लाईजो बीनणी
थांरै बालम रे उणियार
बोल्यो रे जिनावरियो
आडो-तेडो बोल्यो रे
आंगण पड़्यौ रींगणो
गुड़ियौ-गुड़ियौ जाय
सासू थांरौ दीकरौ
म्हां सां डरिया जाय
बोल्यो रे जिनावरियो
आडो-तेडो बोल्यो रे
काजळ भरियो कूंपळौ
जिण पर ढक्कण क्यां
रात सेजां रम रम्या
दिन रौ घूंघट क्यां?
बोल्यो रे जिनावरियो
आडो-तेडो बोल्यो रे
म्हें ढोला थांनै मना करूं
उदियापुर मत जाओ
उदियापुर री कामणी
बातड़ियै बिलमाय
बोल्यो रे जिनावरियो
आडो-तेडो बोल्यो रे
डूंगर ऊपर डूंगरी
सोनो घड़ै सोनार
पगां री पायळ बाजणी
नथड़ी रौ सिणगार
बोल्यो रे जिनावरियो
आडो-तेडो बोल्यो रे
सांकड़ रौ सिखायौ
छोटी नणदळ रौ फ़रमायौ
बोल्यो रे जिनावरियो
आडो-तेडो बोल्यो रे
छोटी घटी सांकड़ी
साम्हा धकिया सैंण
सैंण भळकायो सैलड़ो
गौरां भळकाया नैण
बोल्यो रे जिनावरियो
आडो-तेडो बोल्यो रे
चारां खूणां री बावड़ी
भरी रे हबोळा खाय
हाथी-घोड़ा पीय गया
म्हारी पणघट खाली जाय
बोल्यो रे जिनावरियो
आडो-तेडो बोल्यो रे
