खीचड़लो बड़ो रे स्वाद, खाले खीचड़लो
अैं खीचड़लै नै क्रिसन जी खायो
बण खायो धाबड़ियै री ओट, खाले खीचड़लो
अैं खीचड़लै नै नरसी भगत खायो
बण खायो साधुवां गै साथ, खाले खीचड़लो
अैं खीचड़लै नै बडेरां खायो
बां तो पाई उमर सौ-सौ साल, खाले खीचड़लो
अैं खीचड़लै नै खा’गै बडेरा सोया
बां तो सपना लिया च्यार-च्यार, खाले खीचड़लो
खीचड़लो बड़ो रे स्वाद, खाले खीचड़लो
पैलै सपनै में बडेरां बीरिया बोया
अै तो उग आया कुल्हड़ फोड़, खाले खीचड़लो
दूजै सपनै में बडेरां खोखा खाया
ओ तो अन्न-धन्न होवैगो खूब, खाले खीचड़लो
अगणै सपनै मैं बडेरां आंधी देखी
ओ तो आखा तीज गो सूण, खा ले खीचड़लो
चौथै सपनै में बडेरा पीवी राबड़ी
ओ तो बाजरो होवैगो खूब, खा ले खीचड़लो
अै तो मोठ होवैगा खूब, खा ले खीचड़लो।
(संदर्भ – बैसाख म्हीनै में आखा तीज रै त्यूंवार माथै गायो जावण वाळो खीचड़ै रो गीत)
