पै’ल तो गुरुजी हम जलमिया
पछै बडा भाई
धोम ताप सां पिता जलमिया
सबसे पीछे माई
मगन व्है म्है चल्या मेरा भाई
राम रै नाम रो गेलौ पकड़ो
छोडो नीं मुरखाई
पै’ल तो गुरुजी दूध जमायो
पछै गाय नै दोही
बछड़ा उणरा रमै पेट में
घिरत बेचवा गई
मगन व्है म्है चल्या मेरा भाई
राम रै नाम रो गेलौ पकड़ो
छोडो नीं घमंडाई
कीड़ी रे चाली सासरै
नव मण सुरमौ साथ
हाथी उणरै हाथ में
ऊंठ लपेट्या जाय
मगन व्है म्है चल्या मेरा भाई
राम रै नाम रो गेलौ पकड़ो
छोडो नीं घमंडाई
ईंडा रे हता बोलता
बचिया बोल्या नंई
कहत कबीर सुण भाई साधू!
मूरख समझै नंई
मगन व्है म्है चल्या मेरा भाई
राम रै नाम रो गेलौ पकड़ो
छोडो नीं मुरखाई
