(देवर-भाभी का श्रम-गीत)
नीम तळै लुहारी रै देवर घड़वादे दांतियो।
तनैं असल खेड़ी को घड़वाद्यू अे भावज खरो सौ दांतियौ।
डांडौ तो दिवादे रै देवर चंदण-काठ को
मैं तो चुड़लै कैं रळकै सैं देवर बावूंली दांतियो।
थे तो छिरंगै कै फटकारै देवर बावो ना दांतियो।
थे तो पूंचै कै रळकै सैं भावज बावो ना दांतियो।
थे तो घूंघट कै फटकारै भावज बावो ना दांतियो।
मनैं घूघरिया घड़वादे रै देवर रूपै रा झोळ रा।
तनैं घूघरिया घड़वाद्यूं भावज रूपै रै झोळ रा।
मैं तो अेडी कै ठिमकै सैं देवर बावूंजी दांतियो।
थे तो अेडी कै ठिमकै सैं भावज बावो ना दांतियो।
मैं तो ढेरयां बांवुली देवरिया खरो सो दांतियो।
