दळ बादळ सी दमदमै, टिड्डयां च्यारूंमेर।
सगळा सांभो मोरचा, मती लगावो देर॥
बैठैली जे खेत में, करसी सगळो नास।
बैरण चटकै चट करै, कात्यो-पिन्यो कपास॥
ढोल नगाड़ा पींपला, गाजा-बाजा साज।
बाजैला ढम-ढम जदी, टिड्डयां जासी भाज॥
टिड्डयां खायो खेत नै, खाया हरियल पान।
बूंटा रा बंट काढिया, मगसो पड़ग्यो धान॥
हरियल पत्ता भख लिया, कर्या चालणी बेज।
मिन्टां मांय मचाय दी, घमासाण नीं जेज॥
काळ करोना बण रैयो, मिनखां माथै आज।
फसलां माथै काळ बण, गेरी टिड्डयां गाज॥
टिड्डी आयी खेत में, उडरी च्यारूंमेर।
डरपै-कांपै सावणी, बूंटा घेर-घुमेर॥
आगै टिड्डयां दौड़ री, लारै-लारै लोग।
जे नीं निकळी खेत सूं, फसलां बणसी भोग॥
टिड्डयां छाई खेत में, डारां माथै डार।
साव सफाचट सावणी, किरसो जासी हार॥
लेल्यो पींपा थालियां, हाको-रोळो मांड।
टिड्डयां काढां खेत सूं, नीतर करसी कांड॥
जिण दिस बाजै बायरो, उण दिस टिड्डयां जोर।
लूटेरी लाटो लुटै, दिन देखै ना भोर॥
टिड्डयां थे निकळो टुरो, काळै कोसां दूर।
काळ धरा गेरो मती, फसल घणी भरपूर॥
