गैमर जिसै हेमर गात। पेखै सूर रंग प्रभात॥
साकुर बालिनौ सिरदार। ऊचिस्रवा नौ अवतार॥
असली थेट धर अैराक। हुवै बिळंद बागा हाक॥
जिण रौ बहै येहो जाणि। मेक हजार मुहरि प्रमाणि॥
पड़व आय चहुवै पासि। बिफर पेखियौ वरहासि॥
छौडै झूल तगी छौड़ि। लीधा खुरहरा कर लौड़ि॥
करि करि खांति भांति कुमाय। परचंड कंध पूठीय पाय॥
दूजा फेरियौ दुसमाल। लागौ आजि आभा लाल॥
मांडै पीठि गदिय पलाण। येहो दीध मुख अहलाण॥
ताणै तेज तंग दुतंग। आणै कड़ा-भीड़ै अंग॥
सोवन गात में सिंणगार। येहो पेखि लूण उतार॥
चमर स्याह पख्खर चाढि। बहळौ आजि बढसी बाढि॥
उतमग सिरी वोपै येह। जे झळकत मुकर जेह॥
बहळै कहै अखता वेगि। त्रहसौ बाधि भूप स तेगि॥
उलटा बाटका सुम अेह। जड़िया नाळ चंद्रस जेह॥
पाये उडतौ पखराज। येहो तुरि नकौ आज॥
बितड़ उवर जे बाजोट। कळहणि पाड़णौ धसि कोट॥
बेफर जाणि वडफर बध। कंध बिळद अनमी कंध॥
बाजै बिन्है नासा बस। स्वासा गिणै तेज असस॥
पीवै अंजुळी जळ पाणि। घाये घातणौ घमसाणि॥
नयणे येह सोभा नाम। रचिया जाणि साळिगराम॥
श्रवणे जौति सारग सूध। धज बिळंद जीपण जूध॥
पूठी येह में परमाण। समरथ गात में सोभाण॥
चमर जेमि चमर चार। डमर दाखणौ जुध बार॥
जघे न्रत नटवा जाणि। पेखै फाळ भ्रग प्रमाणि॥
खंजन जेमि चंचळ खांति। भर वौ झांप मक्कड़ भांति॥
छैडि बाळि हूत उछाह। रेसम डोरि लेतौ लाह॥
यण आरूढि सी ‘अजमाल’। ढाहण आजि गयंदा ढाल॥
रचि उधौर छंद कविराज। बुधि प्रमाण वरण्यौ बाज॥
