देस-विदेस रौ कोई विद्वान जद बीकानेर आवै तो राजस्थान राज्य अभिलेखागार नै देखणौ नीं भूलै। नगर रै बिचाळै पब्लिक पार्क स्टेडियम रोड माथै, हरियल दरखतां रै बिचाळै आयोड़ै इण भवन में राजस्थान री अभिलेख धरोहर संग्रहित है। इणरै सागै अभिलेख निदेशालय अर रिपोजिटरी ई अवस्थित है। राजस्थान सरकार इण निदेशालय री थरपणा सन 1955 में कीवी ही, पण मौजूदा वखत में इण निदेशालय रौ जिकौ विकास हुयौ है, वो वैज्ञानिक दीठ सूं घणौ महताऊ है।
आजादी आयां पैली राजस्थान इक्कीस रजवाड़ां में बंट्योड़ौ हौ। इणमें सूं 19 रियासतां अर 2 नै वीकशिप रौ दरजौ मिळ्योड़ौ हौ। यां में सूं हरेक रौ आपरौ सचिवालय अर अभिलेखागार हौ। इण अभिलेखागारां में सैकडूं बरसां रै राजकाज सूं संबंधित जरूरी अभिलेख संग्रहित हा। आजादी मिळ्यां पछै इणी’ज अभिलेखागारां रौ नाम बदळ’र ‘यूनिट रेकर्ड आफिस’ राखीज्यौ अर जिलाधीशां नै यांरा प्रमुख नियंत्रक अधिकारी बणाय दिया। रियासतां रा दूजा सगळा अभिलेखागार ई इण यूनिट रिकर्ड ऑफिसां में मिलाय दिया। पण राजस्थान सरकार 1955 में जद राजस्थान राज्य अभिलेखागार निदेशालय री थरपणा करी तो यूनिट रेकर्ड ऑफिसां में सूं ई। सन 1900 रै पै'ल रा सगळा अभिलेख निदेशालय में भेजण रौ हुकम देय दियौ। पण थोड़ा दिन बीत्यां पछै आ बात अनुभव करीजी के जे निदेशालय में फगत 1900 रै पैल रा अभिलेख इज संग्रहित रह्या, तो राजस्थान रा अभिलेख दो भागां में बंट जासी। इणसूं कई अळूझाड़ पैदा हुय जासी। इण बात नै ध्यान में राख’र जिलां में थापित सगळा यूनिट रेकर्ड आफिस ई राजस्थान राज्य अभिलेखागार रै ताबै में देय दिया। इणरै सागै ई राजस्थान राज्य अभिलेखागार रौ मुख्यालय जयपुर सूं बदळ'नै बीकानेर कर दियौ अर प्रदेस रै 20 जिलां में इणरी शाखावां खोल दी। जुलाई 1962 रै पछै इण सगळै विकेन्द्रित अभिलेखां नै अेकण ठायै भेळा करण रौ तै कियौ। इण भांत मार्च 1953 तांई 1900 रै पै'ल रा सगळा अभिलेखां नै सुरक्षित राखण वास्तै विभाग कानी सूं सात शाखा कार्यालय थापित होयग्या। अे कार्यालय जयपुर, अजमेर, जोधपुर, कोटा, उदयपुर, अलवर अर भरतपुर में है। इण शाखावां में स्थानीय महत्व रा अभिलेख सुरक्षित राखीजै।
बीकानेर में प्रदेस भर रा अभिलेख भेळा हुयां पछै, राजस्थान राज्य अभिलेखागार में बांनै व्यवस्थित रूप सूं राखण तांई राष्ट्रीय अभिलेखागार नई दिल्ली रै ढंग-ढाळै माथै न्यारा न्यारा खंड बणाय नै यांनै व्यवस्थित राखीज्या है।
अभिलेखागार रौ सै सूं महताऊ भाग ‘प्राविधिक खंड’ है। इण खंड में राजस्थान री 21 रियासतां रा अभिलेख सुरक्षित है। इणरै अलावा इण खंड में मौजूदा राजस्थान रै सचिवालय अर दूजै विभागां सूं प्राप्त जरूरी अभिलेख संग्रहित है। इण सगळै अभिलेखां नै वैज्ञानिक पद्धति सूं कीटाणु विहीन कर'नै व्यवस्थित रूप सूं पैड अर बस्तां में बांध’र सुरक्षित राखीजै। सरकार अर जन साधारण री मांग माथै अे अभिलेख वांनै उपलब्ध करावण रौ काम ई इण खंड रै जिम्मै है।
‘मरम्मत अर पुनर्वास खंड’ इण अभिलेखागार रौ दूजौ महताऊ खंड है। वखत बीतां अभिलेख जूना पड़ जावै। वांरौ कागद पीळौ पड़'नै गळ जावै, स्याही फीकी पड़'नै आखर जांखा पड़ जावै अर कीड़ा लाग नै कागद नष्ट होय जावै। ओ विभाग इण सगळी बातां नै ध्यान में राख’र अभिलेखां री वैज्ञानिक तौर तरीकां सूं रक्षा करै। लेमिनेशन अेक इसी प्रक्रिया है, जिणसूं अभिलेखां री उमर करीब दोय सौ बरसां तांई बढ़ जावै। इण खंड में लगैटगै पचास हजार अभिलेखां माथै लेमिनेशन करीज्यौ है। इण खंड रै मांय अेक प्रयोगशाळा ई कांम करै। इण में जूना कागदां री मरम्मत करण री तकनीक विकसित करीजै। इणरै सागै कागद अर स्याही री जांच करनै सरकार नै आ सलाह दिरीजै के भविष्य में किण भांत रौ कागद अर स्याही काम में लेवणी चाइजै।
इण अभिलेखागार रौ तीजौ महताऊ खंड—‘अणु चित्रण खंड’ (माइको फिल्म सेक्शन) है। ओ खंड ई मरम्मत अर पुनर्वास खंड री दांई जरूरी अर जूना अभिलेखां रौ अणुचित्रण करनै वांनै सुरक्षित राखै। अणुचित्रण करण रौ प्रमुख उद्देश्य ओ है के जूना अर महताऊ अभिलेखां वाळा कागदां रै बार-बार हाथ लगावण रौ काम नीं पड़ै। कारण के वे कागद इतरा जूना, गळ्योड़ा अर बड़कण होवै के हाथ लगायां वांरै नष्ट होवण रौ डर रैवै। इण कारण कागद री फिल्म बणायां पछै माइक्रोफिल्म रीडर माथै बांच'नै इणरौ मनचायौ उपयोग होय सकै। इणरै अलावा बारै सूं आवण वाळा शोध अध्येता ई वांछित अभिलेखां री माइको फोटो, फोटो स्टेट, अर ज़ेरोक्स प्रतियां प्राप्त कर सकै। अेयर कंडिशन युक्त माइक्रोफिल्म खंड री दो यूनिटां स्थाई अर मोबाइल दोनूं है। इण दोनूं यूनिटां में अति आधुनिक माइक्रोफिल्म कैमेरा अर दूजा उपकरण उपलब्ध है।
राज्य अभिलेखागार रौ चौथौ महताऊ खंड ‘शोध संदर्भ सेवा खंड’ है। मध्यकाल अर आधुनिक काल सूं संबंधित महताऊ अभिलेख-राशि रौ ओ भंडार देसी-विदेसी विद्वानां अर शोधकर्तावां रै सारू सुभाविक रूप सूं ठेट सूं आकर्षण रौ केन्द्र रह्यौ है। ओ खंड विद्वानां अर शोध अध्येतावां रै वास्तै वांरै विषय सूं संबंधित अभिलेख उपलब्ध करावै। इणरै अलावा शोध नियमां मुजब सगळी सुविधावां ई उपलब्ध करावै। आई साल कोई अेक सौ रै नेड़ा देसी-विदेसी अध्येता इण खंड सूं लाभ उठावै। राज सरकार शोध अध्येतावां री सुविधा वास्तै 1955 तांई रा अभिलेख वांरै उपयोग खातर सुलभ करवाय दिया है। इणसूं भारतीय स्वतंत्रता अर खास करनै राजस्थान रै स्वतंत्रता आंदोलन माथै सोध करण आळै अध्येतावां री संख्या बढगी है।
इणी’ज भांत ‘प्रकाशन खड’ शोध अध्येतावां रै उपयोग वास्तै विभाग रै महताऊ अभिलेखां री विवरणात्मक सूची बणायनै बीं नै प्रकाशित करावै। इणसूं अभिलेखागार में संग्रहित महताऊ सामग्री रौ प्रचार प्रसार विदेसां में ई होय सकै। इण कम में हाल तांई राजस्थानी अर फारसी भाषा री 25 विवरणात्मक सूचियां प्रकाशित कराय दी गई है अर बाकी री प्रकाशनाधीन है। इणरै सागै राज सरकार रै आदेश सूं ओ खंड कई प्रकाशन योजनावां ई पूरी करै। इण प्रकाशन योजना रै हेठे ‘बिजोलिया किसान आंदोलन’ पुस्तक छपगी है अर ‘राजस्थान के स्वतंत्रता आंदोलन का इतिहास’ प्रकाशनाधीन है।
‘सर्वेक्षण खंड’ में सर्वेक्षण योजना हेठे निजू संस्थावां, परिवारां अर व्यक्तियां सूं निजू-संपर्क बणाय'नै वांरै कनै संग्रहित अभिलेखां रौ पतौ लगाईजै। पछै उण संग्रहित अभिलेखां री सार संभाळ सारू संबंधित व्यक्ति के संस्था सूं वा सामग्री अभिलेखागार नै सूंपण री अरज करीजै। जे आगलौ मान जावै जद तो ठीक, नीं तो पछै अभिलेखां री माइक्रोफिल्म बणावण री सलाह दिरीजै। इण योजना मुजब आज तांई अनेकूं महताऊ अभिलेखां री माईक्रोफिल्मां बणगी है।
अभिलेखागार रौ ‘निरीक्षण खंड’ ई घणौ काम रौ है। राजस्थान सरकार राज्य में सगळै नैनै-मोटै विभागीय अभिलेख कक्षां रै नियमित निरीक्षण अर उचित रख-रखाव खातर निर्देशन देवण रौ अधिकार राजस्थान राज्य अभिलेखागार नै दियोड़ौ है। इणरै वास्तै अभिलेखागार रा प्रतिनिधि/अधिकारी वखतसर निरीक्षण कर'नै अभिलेख कक्षा री स्थिति रै संबंध में आपरी प्रतिवेदन देवै।
अेक औरूं ‘प्रशिक्षण खंड’ राज्य रै सगळै विभागां रै कर्मचारियां नै अभिलेख प्रबंध बाबत प्रशिक्षण देवै। अेक महीनै रौ ओ प्रशिक्षण बरस में तीन वेळा आयोजित करीजै। राजस्थान रा कोई 325 कर्मचारी ओ प्रशिक्षण लेय चुका है। इणरै अलावा राज्य रै सगळै जिलां में उठै रा जिला स्तर रा अधिकारियां खातर अभिलेख प्रबंध माथै अेक दो दिन रा सेमिनार ई ओ खंड आयोजित करै। इणसूं अभिलेख प्रबंध बाबत समस्यावां रौ समाधान ई होय जावै।
अभिलेखागार रौ ‘मौखिक इतिहास परियोजना खंड’ स्वतंत्रता सेनानियां री यशोगाथा अर वांरै संस्मरणां नै ध्वनिबद्ध कर'नै मौखिक इतिहास त्यार करण रौ प्रयास करै। अबै इण योजना रै हेठळ इण खंड स्वतंत्रता सेनानियां रै सागै सेवानिवृत्त प्रशासकां अर शिक्षाविदां नै सामाजिक कार्यकर्तावां रा संस्मरण ई ध्वनिबद्ध करणा सरु किया है। हाल तांई राजस्थान रै मोकळै स्वतंत्रता सेनानियां रा संस्मरण टेप (ध्वनिबद्ध) कर लिया है। बांकी रौ काम ई प्रगति माथै है।
इणी’ज भांत ‘पुस्तकालय खंड’ में रियासती प्रशासन नै ढंग सूं चलावण वास्तै जिकौ महताऊ पुस्तकां संग्रहित करीजती, वे सगळी पुस्तकां इण वखत संदर्भ ग्रंथां रै रूप में उपलब्ध है। बीस हजार सूं ई बेसी आं पुस्तकां रौ लाभ शोध अध्येता उठावै।
‘प्रचार-प्रसार खंड’ रै मारफत जन साधारण में अभिलेखां रे प्रति रुचि जागृत करण सारू आई साल अभिलेख सप्ताह रौ आयोजन करीजै। इण सप्ताह में ओ विभाग रुचिकर अभिलेखां री प्रदरसणी लगावै। अभिलेखां रै महत्व माथै गोष्ठियां आयोजित करै। इणरौ लाभ प्रशासक, वकील, अध्यापक छात्र अर वैपारी इत्याद सगळा ई उठावै। दूरदरसण अर रेडियौ माथै अभिलेखां रै महत्व पै परिचर्चावां आयोजित करीजै। इण मौकै ‘अभिलेख’ नाम री अेक सोध पत्रिका ई प्रकाशित करीजै।
अभिलेखां रौ महत्व इण बात सूं जाणीजै के इण अभिलेखागार में 17 वीं अर 18 वीं सदी रा जयपुर रियासत रा जिकौ अभिलेख संग्रहित हैं, उण राजस्व अभिलेखां में अडसट्ठै, याद्दाश्ती, तकसीम, तखमीना, जमाबंदी दस्तूर, अलअमल दस्तूर, खसरा निरख बाजार, निरख जमाबंदी, परवाना, मुवावजना कलां, मुवावजना खुर्द, अवारिजा, रोजनामचा इत्याद प्रमुख है। अे सगळा आलेख राजस्थान रै तत्कालीन ग्रामीण जीवण रा आधार थंभ है। इण कारण देसी-विदेसी शोध अध्येतावां रै घणै काम रा है।
इणी’ज भांत फारसी भाषा री अभिलेख सामग्री ई घणी महताऊ है। इणमें फरमान, निशान, मंसूर, सनद, सुक्का, अखबारात, अरजदास्त, वकील रिपोर्ट अर खतूत अेहलकारान इत्याद अभिलेख घणा काम रा है। इणां में सूं घणकरा मुगल बादशावां कानी सूं राजपूत राजावां नै मनसबदारी देवती वखत जारी कियोड़ा है। 300 सूं बेसी फरमान सोने री अर रंगीन चित्रामकारी रै कारण देखवाजोग है। मुगल बादशाह अकबर, जहांगीर, शाहजहां, औरंगजेब, दारा शिकोह अर नूरजहां कानी सूं जारी अे अभिलेख इतिहास री दीठ सूं घणा कीमती है। राजस्थान राज्य अभिलेखागार में जिकौ ‘अभिलेख संपदा’ संग्रहित है, वा शोध री दीठ सूं अनूठौ है। आज रौ शोध अध्येता इतिहास रै वैज्ञानिक अध्ययन माथै विशेष जोर देवै। वो शासक रै गुण-अवगुण अर कथणी-करणी करतां तत्कालीन सामाजिक, आर्थिक, सांस्कृतिक अर कृषि संबंधी जाणकारी बेसी लेवणी चावै। जूना अभिलेख इण काम सारू घणा महताऊ है। हिंदी, राजस्थानी, उर्दू, फारसी अर अंग्रेजी में लिख्योड़ै अभिलेखां री तादाद इण बात सूं जाणी'ज सकै के जे इण सगळां नै अेक रेखा में राख दिया जावै तो वांरी लंबाई साढी पांच लाख फीट होय जावै।
अे अभिलेख प्राचीन होवण रै सागै विविध रूपां में उपलब्ध है। उदाहरण सरूप तोजी, नत्थी अर पत्रावली इत्याद। यांरौ सरूप देख’र न्यारी-न्यारी रियासतां में अभिलेख राखण री प्रणालियां रौ ई ठा पड़ै। सगळी रियासतां री अभिलेख प्रणाली श्रृंखलावां री न्यारी-न्यारी जाणकारी देवणी तो इण अभिलेख में संभव कोनी, इण वास्तै अठै कीं प्रमुख रियासतां री अभिलेख श्रृंखलावां बाबत जाणकारी दिरीजै। जयपुर रियासत रा राजस्थानी भाषा रा अभिलेख 17 वीं सदी सूं लगाय'नै 19 वीं सदी तांई रा उपलब्ध है। इणां में अड़सट्ठा, नुसखापुण्य, दस्तूर कौमवार, खरीता, बकाया, पाना माहवारी, खतूत अहलकारान, जनानी तहरीर अर अरजदास्त श्रृंखलावां प्रमुख है। इणीज भांत 1830 सूं 1950 तांई रा जयपुर सचिवालय रा न्यारै-न्यारै विभागां रा अंग्रेजी भाषा में लिख्योड़ा अभिलेख ई उपलब्ध है। जयपुर रियासत रै ज्यूं जोधपुर रियासत री अभिलेख श्रृंखलावां ई घणी महताऊ है। मारवाड़ी में लिख्योड़ौ जोधपुर दौ दस्तरी रेकर्ड आपरी हकीकत बही, हथबही, विवाह बही, पट्टा बही इत्याद अभिलेख श्रृंखलावां इतिहासविदां वास्तै घणै काम री है। अे श्रृंखलावां सन 1643 सूं सरु होवै। अंग्रेजी रेकर्ड अर परगना रेकर्ड, जिकौ सन 1810 सूं सरु होयनै 1950 तांई रौ है, वो मारवाड़ रै सगळै परगनां अर सचिवालय रै सगळै विभागां सूं संबंधित है।
बीकानेर रियासत री अभिलेख श्रृंखलावां ई मारवाड़ी, उर्दू, हिन्दी अर अंग्रेजी में उपलब्ध है। इण में 17 वीं सदी सूं सरु कियोड़ी अर सगळै विषयां सूं संबंधित भांत-भांत री बहियां मौजूद है। उदाहरणसरूप पट्टा परवाणा बही, हासल बही, जकात बही सावा बही, कागद बही, कमठाणा बही अर ब्याव बही इत्याद प्रमुख है। उर्दू अर हिन्दी अभिलेख श्रृंखलावां में माल, दीवानी अर फौजदारी विषय रा कागद है। इणरै अलावा बीकानेर रियासत रै सचिवालय रा अंग्रेजी अभिलेख ई उपलब्ध है। अे अभिलेख राजस्थान रै आधुनिक इतिहास तांई घणा महताऊ स्रोत मानीजै।
उगूणै राजस्थान री कोटा अर बूंदी इत्याद रियासतां री अभिलेख श्रृंखलावां प्राचीन होवण रै सागै घणी सूचनापरक है। राजस्थानी भाषा री हाड़ौती बोली में लिखी कोटा री अभिलेख श्रृंखलावां, जिकौ सन 1635 सूं मिळै, उणां में कहवा माल हासिल तालीक, फौज, बराड़, कोतवाळी, तोपखाना अर कारखाना इत्याद विषयां सूं संबंधित है। बाद में अंग्रेजी भाषा रौ प्रभाव बढवा सूं कोटा सचिवालय री अभिलेख श्रृंखलावां अंग्रेजी में ई मिळै।
उदयपुर रियासत री अभिलेख श्रृंखलावां मेवाड़ी, हिंदी अर अंग्रेजी में उपलब्ध है। मेवाड़ी में अभिलेख 18 वीं अर 19 वीं सदी रा है अर अंग्रेजी में सन 1948 सूं 1962 तांई रा है। अंग्रेजी में लिख्योड़ा सचिवालय अभिलेखां में सीमा विवाद, जागीरां सूं संबंधित अर जनगणना संबंधी पत्रावलियां शोध री दीठ सूं घणा महताऊ है। इणांरै अलावा उदयपुर रा श्यामलदास अर मेहता संग्रामसिंह अभिलेख ई मध्यकालीन राजस्थान इतिहास री दीठ सूं महताऊ स्रोत है।
सन 1963 में राजस्थान री सगळी रियासतां रा अभिलेखां सागै अजमेर कमिश्नर अर चीफ कमिश्नर रै कार्यालयां रा अभिलेख ई बीकानेर मंगाय लिया हा। अंग्रेजी, उर्दू अर हिंदी भाषा में लिख्योड़ा अे अभिलेख सन 1818 सूं 1956 तांई रा है। यां में भू राजस्व, प्रशासन, चिकित्सा, धारमिक मामला, अजमेर ट्रेजरी, प्रोटेक्शन, हिसाब, शिक्षा, वित्त, मेळा, सामाजिक-सुधार सेटलमेंट, रजिस्ट्रेशन, पट्टा, नीमच, कागजात अर दरगाह इत्याद री पत्राबलियां है। अजमेर रा अे अभिलेख राजपूत राजावां रै अर अंग्रेजां रै संबंधां री जाणकारी देवै।
इण भांत राजस्थान री इण पांच प्रमुख रियासतां अर चीफ कमिश्नरी अजमेर रा अभिलेखां रै अलावा अलवर, किशनगढ सिरोही, भरतपुर, झालावाड़, कुशलगढ़, साहपुरा, करौली, डूंगरपुर अर बांसवाड़ा इत्याद रा 19 वीं अर 20 वीं सदी रै मध्य तांई रा अभिलेख ई अठै मौजूद हैं।
इण राजकीय अर प्रशासनिक अभिलेखां रै अलावा इण अभिलेखागार में जोधपुर अर अलवर रै इतिहास कार्यालय रा निजू अभिलेख ई संग्रहित है। अे सगळा अभिलेख राजस्थानी भाषा अर साहित्य री सांगोपांग जाणकारी देवै। इण अभिलेखां रै पाण राजस्थान रै इतिहास री कई विवाद पूर्ण बातां रौ खुलासौ ई होय जावै, जिकौ सरकारी कागदां सूं संभव नीं है।
इण भांत सार बात आ के अभिलेखागार अेक कानी व्यक्तिगत अभिलेखां री पूर्ति करनै जनसाधारण री समस्यावां रौ उकेल काढै, तो दूजी कानी बहुआयामी अभिलेखां रै रूप में प्रशासनिक समस्यावां रौ उकेल ई बतावै। इणरै अलावा ओ अैतिहासिक शोध संपदा रौ अेक अमोलक खजानौ है, जिकौ शोध अध्येतावां रै वास्तै घणै काम रौ है।
